CRACKDOWN SA MGA ILEGAL, OVERCHARGING NA TAXI SA NAIWA SINIMULAN NA

SINIMULAN mismo ni Transportation Secretary Vince Dizon ang crack down sa mga ilegal at overcharging na taxi sa NAIA nitong Sabado ng umaga.

Ang inspeksyon ay kasunod ng utos ni Pangulong Ferdinand Marcos Jr. na siguraduhing hindi pinagsasamantalahan ng mga taxi ang mga pasahero sa airport.

Dalawang airport taxi ang nahuling pumapasada na colorum habang nandun mismo si Secretary Dizon.

Kasama ng Department of Transportation (DOTr) ang Land Transportation Office (LTO) at Land Transportation Franchising and Regulatory Board (LTFRB) sa operations sa NAIA at nahuli ang mga taxi kabilang na rito ang isa na may prangkisang pang-truck.

Sinabi ng DOTr na tuluy-tuloy ang operasyon na hulihin ang mga taxing nag-oovercharge at mga colorum sa airport.

Dagdag pa ni Dizon, kailangan matigil na itong pagsasamantala ng mga taxi driver at operator sa ating mga pasaherong bumabyahe mula sa airport.

Aniya, magagawa ito kung sila ay patuloy na huhulihin at papatawan ng mabibigat na parusa para matakot sila at tigilan na ang pangloloko sa mga pasahero.