DATA NG PHILHEALTH SINIMULAN NANG I-UPLOAD SA DARK WEB

ANG mga data na na-hack mula sa Philippine Health Insurance Corporation (PhilHealth), kabilang ang mga detalye ng empleyado, ay nagsimula nang lumabas sa dark web matapos ang hiling na ransom ng mga hacker ay hindi tugunan ng gobyerno. Sa paunang pagsusuri, ilan sa nai-publish na impormasyon ang  identification card ng mga empleyado ng PhilHealth, kabilang ang mga Government Service Insurance System (GSIS) ID.

Ayon kay Department of Information and Communications Technology undersecretary Jeffrey Dy na naobserbahan nila sa dark web ang mga kopya ng payroll ng mga empleyado at iba pang detalye tulad ng mga regional office, memo, direktiba, working files, at hospital bills. “In terms of PII (personal identifiable information), may nakita kaming mga ID, pictures, na hindi pa namin matiyak sa ngayon kung mga Philhealth employees, or members,” pahayag ni  Dy sa ulat mula sa CNN.

Ipinahiwatig niya na ang mga ito ay tila “teaser” mula sa mga hacker na maaaring naghihintay pa rin sa gobyerno na sumunod sa kanilang ransom demand.  

Nauna rito, iniulat ng DICT na ang mga cybercriminal ay humingi ng US$300,000 (o P17 milyon) kapalit ng mga decryption key at hindi isiniwalat ang iligal na nakuhang data. 

Bilang tugon, inulit ng gobyerno ang patakaran nito sa hindi pagbabayad ng anumang ransom sa mga hacker. Iginiit ng DICT at PhilHealth na ang database ng mga miyembro, na naglalaman ng pribadong impormasyon, claim, kontribusyon, at detalye ng accreditation, ay nananatiling buo dahil hindi ito bahagi ng mga server na naapektuhan ng pag-atake ng Medusa ransomware.

Gayunpaman, hindi nito ginagarantiya na hindi na-access ng mga hacker ang impormasyon ng mga miyembro.  Nilinaw ng mga awtoridad na ito ay dahil ang parehong mga detalye sa database ay maaaring magagamit sa iba pang mga server na apektado ng pag-hack.

“Mukhang ang mga workstation ng Philhealth at ilang iba pang mga server tulad ng mga server ng pagsasanay na apektado ng Medusa ay maaaring naglalaman ng impormasyong ito,” paliwanag ni Dy.

Binanggit ng PhilHealth na inaalam pa nito kung ang data na nakuha ng mga hacker ay may kasamang personal na detalye ng mga miyembro nito.