PALPARAN ABSWELTO SA KIDNAPPING NG MAGKAPATID NA MAGSASAKA

INABSWELTO ng Malolos City Regional Trial Court Branch 19 si retired Army General Jovito Palparan at ilang iba pa kaugnay ng kasong pagdukot at torture sa magkapatid na magsasaka sa Bulacan noong 2006.

Sinabi ng korte na bigo ang prosekusyon na patunayan ang guilt beyond reasonable doubt kung kaya naabswelto si Palparan sa isinampang kaso ng magkapatid na magsasakang sina Raymond at Reynaldo Manalo.

Sa kabila ng acquittal, nangako si Raymond na itutuloy pa rin niya ang pagkuha ng hustisya para sa kanilang magkapatid.

Una nang kinasuhan ng Department of Justice (DOJ) ng kidnapping at serious illegal detention with serious physical injuries si Palparan kaugnay ng umano’y pagdukot sa magkapatid na Manalo.

Ayon kay Raymond, kinidnap sila ng aniya ay mga militar mula sa kanilang tahanan sa San Ildefonso, Bulacan noong 2006.

Sinabi niyang ikinulong sila ng mahigit isang taon sa ilang kampo ng sundalo sa Timog Katagalugan hanggang sa magawa nilang makatakas noong Agosto 13, 2007.

Ayon sa kanya, habang sila ay hawak ng mga militar ay nagawa niyang makausap ang dalawang nawawalang estudyante ng University of the Philippines na aniya ay ikinulong din ng mga tauhan ni Palparan.

Nakita rin umano niya ang mga estudyanteng sina Sherlyn Cadapan at Karen Empeño na tinotorture ng mga bumihag sa kanila.

Si Palparan ay hinatulan ng hanggang 40-taon na pagkakakulong sa kasong kidnapping at serious illegal detention kina Cadapan at Empeño.