TVJ TUNAY NA MAY-ARI NG ‘EAT BULAGA’ TRADEMARK – IPOPHL

NAGPALABAS ng desisyon ang Intellectual Property Office of the Philippines (IPOPHL) na pumapabor kina Tito Sotto, Vic Sotto at Joey de Leon (TVJ) bilang tunay na may-ari ng “Eat Bulaga” trademark.

Kasabay nito, ibinasura ng IPOPHL ang trademark registration ng Television and Production Exponents Inc. o TAPE Inc. para sa mga pangalang “Eat Bulaga” at “EB.” Ang dalawang partido ay kapwa nagsasabing kanila ang trademark na “Eat Bulaga” na siyang ginagamit ngayon ng TAPE sa kanilang noontime show sa GMA 7.

Samantala, ang TVJ ay lumipat sa TV5 at nag-co-produce ng sarili nitong noontime show na “E.A.T” noong Hulyo.

Noong Agosto, pinayagan ang TAPE na mairenew ang trademark na “Eat Bulaga!” at ang logo nito para sa panibagong 10-taon.

Gayunman, naghain ng petisyon sina Tito, Vic at Joey na kanselahin ang nasabing renewal.

Sa ipinalabas na desisyon ng IPOPHL nitong Disyembre 4, sinabi nitong ang TVJ ang nag-establisa ng pangalang “Eat Bulaga.”

“Having sufficiently established how Petitioners coined the EAT BULAGA mark, it is Petitioners and not Respondent-Registrant who owns the mark. Considering that Petitioners are the owners, they have absolute and exclusive right to register the EAT BULAGA mark and all variations thereto,” anang desisyon.