SOLGEN HINDI IKINAGULAT ANG KASO VS MAHARLIKA FUND

INAASAHAN  na ni Solicitor General Menardo Guevarra ang paghahain ng petisyon na humahamon sa legalidad ng Republic Act No. 11954 o ang  kontrobersiyal na Maharlika Investment Fund Act of 2023.

Sa isang mensahe, sinabi ni Guevarra: “The filing of such a petition is expected, given the significant public interest surrounding the creation of the Maharlika Fund. The Office of the Solicitor General (OSG) has been closely monitoring the public debates surrounding the fund to identify any legal issues of paramount importance that may be brought before the Supreme Court.”

Isinusulong ng MIF ang pagtatatag ng isang sovereign wealth fund na ang pangunahing layunin ay suportahan ang mga proyekto ng pamahalaan.

Sa ilalim ng batas na ito, itatatag ang Maharlika Investments Corp. (MIC) na pinondohan ng minimum capital na P75 bilyon para sa kasalukuyang taon na mula sa Land Bank of the Philippines at Development Bank of the Philippines.

Noong Sept. 18, naghain sa Supreme Court ng petisyon na ideklarang unconstitutional ang MIF sina Senator Aquilino “Koko” Pimentel III, dating kongresista Bayan Muna Chairman Neri Javier Colmenares, at dating Bayan Muna congressmen Carlos Isagani Zarate at Ferdinand Gaite.

Ang RA 11954, na pamamahalaan ng MIC, ay nilagdaan na maging batas ni  President Ferdinand Marcos Jr. noong July 18 na sa kasalukuyan ay mayroon nang P150 bilyong “seed capital.”