DSWD INIIMBESTIGAHAN 4Ps CASH GRANT NA NAPUPUNTA SA KULTO

INIIMBESTIGAHAN na ng Department of Social Welfare and Development (DSWD) ang “Socorro cult” sa Surigao del Norte kaugnay ng ulat na umano’y pagkolekta nito ng Pantawid Pamilyang Pilipino Program (4Ps) at iba pang ayudang tinatanggap ng kanilang mga miyembro.

Ito ang inihayag ni DSWD Secretary Rex Gatchalian sa pagdinig ng Senate Finance Subcommittee nitong Miyerkules kaugnay ng panukalang P207.37-billion budget ng Departamento para sa susunod na taon.

Sa nasabing pagdinig ay tinanong ni Senadora Risa Hontiveros si Gatchalian kung tinututukan ng ahensiya ang benepisaryo ng 4Ps sa Socorro, Surigao del Norte kung saan sinasabing ang ayuda mula sa gobyerno ay kinukuha umano ng kulto.

Bukod sa 4Ps, kinokolekta din umano ng mga opisyal ng kulto ang senior citizen pension at Assistance to Individuals in Crisis Situations (AICS) ng kanilang mga miyembro.

Kung may katotohan umano ang alegasyong ito, sinabi ni Hontiveros na parang pinopondohan ng gobyerno ang isang kulto.

“We took inventory immediately of how many 4Ps households we have there. But obviously, these are initial numbers (because) it could not be in just one sitio but in more sitios. In Sitio Kapihan, for example, we have 74 households who are 4Ps beneficiaries. In Barangay Siring, we have 503 households,” paliwanag ni Gatchalian.

Ayon sa DSWD secretary, inatasan na niya ang regional director ng ahensiya upang alamin ang pamamahagi ng mga ayuda at magbibigay sila sa Senado ng update ng kanilang imbestigasyon.