BIKTIMA NG ILLEGAL RECRUITER NAHARANG NG BI SA CLARK AIRPORT

NI LEX MANALO

NAHARANG ng mga operatiba ng Bureau of Immigration ang isang biktima ng illegal recruiter habang paalis sana gamit ang Clark International Airport (CIA) Terminal 2 sa Pampanga

Kinilala ang biktima na si Ana, 37.

Tinangka ni Ana na umalis patungong Hong Kong noong September 18 lulan ng Eva Air flight.

Sa paunang inspeksiyon, napansin ng immigration officer ang paiba-ibang sagot ni Ana kung kaya ni-refer ito para sa pangalawang interbyu.

Ayon sa biktima, bibiyahe siya patungong Hong Kong para sa apat na araw na bakasyon. Gayunman, bigo siyang magbigay ng mga dagdag na detalye ng kanyang biyahe.

Nadiskubre pa na may hawak itong valid na Qatar work e-visa.

Inamin ni Ana na binigyan siya ng instruksiyon ng kanyang recruiter na umalis ng bansa bilang tourist at maghintay ng kanyang work visa na ibibigay sa kanya sa Hong Kong.

Pinangakuan umano siya ng trabaho bilang promotion specialist kahit wala pa siyang tinatanggap na kontrata.

Sinabihan din umano siya ng kanyang recruiter na i-delete ang lahat ng dokumentong ipinadala sa kanya.

Ayon kay BI Commissioner Norman Tansingco, ipinadala na nila ang kaso ni Ana sa Inter-Agency Council Against Trafficking para sa kaukulang imbestigasyon at pagsasampa ng kaso laban sa recruiter ng biktima.