62 PINOY MULA ISRAEL DARATING SA OKT. 30 — DMW

MAY 62 Pilipino, kabilang ang dalawang sanggol, mula sa Israel ang darating sa bansa sa Lunes, ayon sa Department of Migrant Workers (DMW). Sinabi ni DMW officer in charge Undersecretary Hans Leo Cacdac na ang mga magbabalik na Pilipino ay ang ikaapat na batch ng mga repatriate na tumakas sa Israel sa gitna ng hidwaan nito sa militanteng grupo ng Hamas.

For this fourth batch, there will be more hotel workers. Around 32 hotel workers and 28 caregivers are coming home… 60 OFWs (overseas Filipino workers), plus two infants,” ani Cacdac. Sinabi rin niya na magpapatuloy ang pagsisikap sa repatriation ng DMW, katuwang ang Overseas Welfare Workers Administration (OWWA) at Department of Foreign Affairs (DFA).

Patuloy na sinusubaybayan ng labor attaché ng DMW at ng welfare attaché ng OWWA ang “rescue zones” sa Israel kung saan dinala ang mga lumikas na OFW, ayon kay Cacdac, na binanggit na isang augmentation team ang ipapadala sa Middle Eastern state sa Nobyembre 2 upang palakasin ang kasalukuyang mga tauhan doon.

“Doon sa southern part na nasa hangganan ng Gaza, ‘yun ang declared na ‘no entry zone’ ng Israeli defense forces, and ‘yung mga Filipino sa zone na ‘yun, nailikas sa safer ground.

Kaya’t ‘yun ang pinupuntahan ng ating labor attaché at welfare officer, ‘yung mga rescue area. “Hindi ko muna binibigay siyempre ‘yung mga tukoy na rescue area.

Nais din naming igalang ang seguridad at ang privacy ng aming mga OFW na nadadala sa mas ligtas na lugar,” paliwanag ni Cacdac. Samantala, nasa124 OFW mula sa Lebanon ang humingi ng repatriation, ani Cacdac. Inirerekomenda ng Embahada ng Pilipinas sa Beirut ang “voluntary repatriation” ng mga Pilipinong naninirahan sa Lebanon, habang tumataas ang tensyon sa hangganan sa pagitan ng Israel at Hezbollah sa kalagayan ng nagpapatuloy na digmaang Israel-Hamas.

“Hindi rin magtatagal at magkakaroon na rin tayo ng first batch na uuwi from Lebanon.

Wala pa tayong specific date (yet) but we’re looking at the possibility of this coming week na meron nang maililikas from there,” pahayag niya.

Tiniyak ni Cacdac na handa ang gobyerno na magbigay ng reintegration at post-arrival assistance sa mga repatriated OFWs.