BOC NAGBABALA VS PARCEL, LOVE SCAM

NAGBABALA nitong Miyerkules ang Bureau of Customs (BOC) sa publiko laban sa lumalaganap na parcel o love scam ngayong holiday season.

“Maging maingat sa mga tawag, mensahe, o email na nagsasabing mayroon kayong package o parcel na nakabinbin sa BOC at kinakailangan ninyong magbayad through personal bank account o money remittance upang ito ay mailabas,” anang BOC sa kanilang social media post.

Ayon sa Kagawaran, madalas ay nagpapanggap ang mga kawatan na taga-BOC o isang dayuhan.

Pinaalalahanan nito ang publiko na ang pagbabayad ng customs duties at taxes ay maaari lang gawin sa BOC cashier o sa pamamagitan ng Authorized Agent Banks (AAB).

Sa pahayag ng BOC, mag-check muna sa website ng Department of Trade and Industry (DTI) kung ang sinasabing courier o forwarder ay accredited.

Maaari ring makipag-ugnayan sa BOC para tiyakin kung ang resibo, tracking number, at iba pang dokumento na natanggap ay totoo o pekeng impormasyon lamang.

Ayon pa sa Kagawaran, maaaring makipag-iugnayan sa BOC sa pamamagitan ng kanilang landline na 8705-6000 o mag-email sa boc.cares@customs.gov.ph at sa http://customs.gov.ph.