‘ANTI-SARDINAS’ POLICY INILUNSAD NG LTO

ALINSUNOD sa direktiba ni Pangulong Ferdinand R. Marcos Jr. at Department of Transportation (DOTr) Secretary Vince B. Dizon na tiyakin ang kaginhawaan at kaligtasan ng mga pasahero, mas pinaigting ng Land Transportation Office (LTO), sa ilalim ng pamumuno ni Acting Assistant Secretary attorney Greg G. Pua Jr., ang kampanya laban sa overloading sa mga pampublikong sasakyan sa pamamagitan ng mahigpit na pagpapatupad ng “Anti-Sardinas Policy.”

Ang “Anti–Sardinas” Policy ay isang patakaran ng  panghuhuli sa mga pampublikong sasakyang may siksikang parang sardinas.

Pagmumultahin at posibleng mawalan ng prangkisa ang mga pampublikong sasakyang mahuhuling nagsisiksikan ang mga pasahero.

Bilang bahagi ng pinaigting na kampanyang ito, nagtalaga ang ahensya ng mga tauhan mula sa Law Enforcement Service at mga regional offices upang magsagawa ng inspeksyon at operasyon sa mga pangunahing lansangan at terminal sa iba’t ibang panig ng bansa.

Tinututukan ng mga operasyong ito ang mga pampublikong sasakyang lumalabag sa itinakdang kapasidad, upang masigurong hindi naisasakripisyo ang kaligtasan ng mga mananakay.