7 TRANSPORT GROUPS ‘DI LALAHOK SA TIGIL PASADA

“NO STRIKE.”

Ito ang tiniyak ng pitong transport groups na nagpahayag na hindi sila sasama sa nationwide transport strike ng grupong Malayang Alyansa ng Bus Employees at Laborers Para sa Karapatan sa Paggawa (MANIBELA) itong Lunes, Oktubre 16.

Ang pitong grupo na tinatawag na Magnificent 7 ay binubuo ng Pasang Masda, Alliance of Transport Operators and Drivers Association of the Philippines (ALTODAP), Pinagkaisang Samahan ng mga Tsuper at Opereytors Nationwide (PISTON), Alliance of Concerned Transport Organization (ACTO), Federation of Jeepney Operators and Drivers Association of the Philippines (FEJODAP), Stop and Go, at Liga ng Transportasyon at Operators ng Pilipinas (LTOP).

Lumagda sa isang manifesto ang mga lider ng pitong transport groups na sumusuporta sa liderato ni suspended Land Transportation Franchising and Regulatory Board (LTFRB) chairman Teofilo Guadiz III.

Si Guadiz ay nasuspinde bunsod ng akusasyong korapsiyon sa LTFRB.

Nanindigan ang pitong grupo na hindi sila lalahok sa ilulunsad na tigil-pasada itong Lunes.

Tanging ang MANIBELA ang nagpahayag na itutuloy nila ang malawakang transport strike bilang pagpapahayag ng pagtutol sa PUV Modernization Program.

Una nang pinulong ni MMDA general manager Undersecretary Procopio Lipana ang mga lider ng Magnificent 7 para pag-usapan ang tigil –pasada.