VP DUTERTE ITINANGGING SANGKOT SA ‘DAVAO DEATH SQUAD’

PINASINUNGALINGAN nitong Martes ni Vice President Sara Duterte na sangkot siya sa anumang gawain ng vigilante group na “Davao Death Squad” (DDS) na umano’y nasa likod ng mga pagpatay sa mga taong dawit sa krimen at ilegal na droga.

Ginawa ni Duterte ang pahayag kasunod na alegasyon ni dating Senador Antonio Trillanes IV sa isang TV interview na ang Bise Presidente ay isa sa respondents ng imbestigasyong isinasagawa ng International Criminal Court (ICC) dahil sa umano’y kanyang pagsang-ayon sa “tokhang operations” ng DDS noong panahon na siya ang mayor ng Davao City.

“Sa mga taon na nagsilbi ako bilang Vice Mayor at Mayor ng Davao City, ni minsan ay hindi napag-usapan o naiugnay ang aking pangalan sa umano’y Davao Death Squad. Subalit matapos akong manalo bilang Vice President, bigla na lang nagkaroon ng testigo laban sa akin at ngayon ay kasama na ako sa mga akusado sa International Criminal Court,” ani Duterte.

“Hindi ko kailangan ng death squad para sa mga bagay na kaya kong gawin,” dagdag pa nito.

Gayunman, sinabi niyang handa siyang humarap sa anumang akusasyon laban sa kanya basta’t sa korte lamang ng Pilipinas.

Aniya, hindi siya lalahok o magiging parte ng isang prosesong hindi lamang magsasadlak sa kahihiyan sa bansa kundi dudurog din sa dignidad ng ating mga huwes, korte, at buong justice system ng Pilipinas.