PRESO PUMUGA SA ZAMBALES JAIL

NI KEVIN GALANG

ISANG preso ang pumuga sa Zambales Provincial Jail sa Bgy. Palanginan sa bayan ng Iba.

Sa ulat kay Police Regional Office 3 director Brig. Gen. Jose Hidalgo Jr., kinilala ang nakatakas na si Ronnel Rayman, 33, ng Purok 1, Bgy. Bangantalinga, Iba, Zambales.

Agad ipinagbigay alam ni prison guard  Ermin Gene Orencia, 50, ng Zone 5, Iba, Zambales sa Zambales police ang pangyayari.

Batay sa inisyal na imbestigasyon, nitong Huwebes, Setyembre 28, pinayagan ng prison guards na sina Freddie Dacanay, Kimberly Español, at Lady Ann Bautista si Rayman at isa pang bilanggo na i-repair ang tumatagas na tubo sa bubong ng kulungan.

Pagkalipas ng ilang minuto, inatasan ni Orencia ang dalawang preso na itigil na ang pagkukumpuni at bumaba na.

Gayunman, sa halip na tumalima, bigla na lamang tumalon si Rayman sa bakod na may alambre patungo sa gusali ng Department of Agrarian  Reform at tumakbo patakas.

Agad na nagsagawa ng pagtugis ang mga awtoridad sa tumakas na bilanggo.