‘NO WORK, NO PAY’ SA OCT. 30, NOV. 1-2 — DOLE

NAGPAALALA ang Department of Labor and Employment sa mga employer sa tamang pagbabayad ng sahod para sa mga manggagawang magre-report sa trabaho sa darating na holidays.

Nilinaw ni Labor Secretary Bienvenido Laguesma sa isang panayam sa radio na ang Oktubre 30, Nobyembre 1 at 2 ay special non-working holidays, na nangangahulugang ipapatupad ang panuntunang “no work, no pay”.

Naglabas ang DOLE noong nakaraang linggo ng advisory na nagsasaad ng pagkalkula ng sahod para sa darating na special non-working holidays.

Pinaalalahanan ni Laguesma ang publiko na ang patakarang “no work, no pay” ay hindi maaaring iapply sa mga lugar ng trabaho na may alternatibong kaayusan na nagbabayad pa rin sa mga manggagawa sa mga espesyal na non-working holiday.

“Maaaring may umiiral na patakaran ng kumpanya na, kahit hindi ka pumasok sa trabaho dahil sa holiday, babayaran ka pa rin, o anumang katulad na kaayusan na mayroon ang iyong employer,” sabi ni Laguesma sa panayam.

Ang 2023 Barangay at Sangguniang Kabataan Elections ay idaraos sa Oktubre 30, samantalang ang Nobyembre 1 ay All Saints’ Day, habang ang Nobyembre 2 ay All Soul’s Day at ito ay isang karagdagang espesyal na araw na walang pasok.