NAG-BOMB JOKE NA PASAHERO INARESTO SA NAIA

SA himpilan ng pulisya ang bagsak ng isang pasahero ng AirAsia  matapos itong mag-bomb joke nang hindi makasama sa flight patungong Tacloban noong Miyerkules sa Terminal 2 Ninoy Aquino International Airport (NAIA).

Ayon sa PNP-Aviation Security Unit (AVSEU), sinabihan umano ng airline staffer ang pasahero na i-rebook na lang ang kanyang flight dahil hindi na siya umabot sa kanyang flight patungo sana sa Tacloban.

Subalit, sinabi umano ng pasahero:  “Sarap pasabugin ng eroplano nyo.”

Nang sitahin umano ang pasahero na hindi tama ang kanyang sinabi ay idinagdag nitong: “Huwag mo akong maano-ano dyan ha etong mainit ang ulo ko.”

Kaya napilitan ang airline personnel na humingi ng tulong sa AVSEC para imbitahin sa kanilang himpilan at pagpaliwagin ang pasahero.

Hindi na nagsampa ng reklamo ang airline at inalagay na lamang sa blacklist ang pasahero.