PASTOR QUIBOLOY IPASA-SUBPOENA SA ‘DI PAGSIPOT SA SENATE COMMITTEE HEARING

MAGPAPALABAS ng subpoena ang Senate Committee on Women, Children, Family Relations and Gender Equality laban kay Kingdom of Jesus Christ (KOJC) leader Pastor Apollo Quiboloy dahil sa hindi nito pagsipot sa isinagawang imbestigasyon ng komite nitong Martes kaugnay sa mga alegasyon laban sa pinamumunuan nitong religious group.

“Dahil nakapagpadala po ng dalawang imbitasyon, one by LBC and one by registered mail, pero walang sagot at attendance ni Pastor Quiboloy, the chair would move to subpoena Pastor Apollo Carreon Quiboloy for the next hearing of this committee,”ani  Senator Risa Hontiveros na siyang namumuno sa naturang komite.

Ayon kay  Hontiveros, nagpadala ng liham si Quiboloy kay Senate President Juan Miguel Zubiri.  Hindi na nagbigay ng dagdag pang detalye ang senadora hinggil dito subalit sinabing ang liham ay tinanggap para isama sa rekord ng Senate committee.

Una rito, inakusahan ang KOJC na sangkot sa large-scale human trafficking, rape, sexual abuse at violence, at child abuse.

Bagama’t nagpadala ng kanyang abogado si Quiboloy sa ginanap na pagdinig ng komite, sinabi ni Hontiveros na “irrelevant” ito dahil ang mga akusasyon aniya ng mga biktima ay direktang dapat na sagutin ng nasabing religious leader.

Samantala, sinabi ng senadora na ‘di anak ng Diyos si Quiboloy upang maging exempted sa pagdalo sa mga pagdinig sa Senado.