PRESO NAGTANGKANG MAGSUICICE SA KULUNGAN

NI KEVIN GALANG

ISANG bilanggo sa Olongapo City Police Station 3 ang nagtangkang magpakamatay kahapon, Setyembre 30. Napigilan naman ang tangkang suicide sa jail facility na matatagpuan sa  Bgy. East Tapinac nang agad na makapagsumbong sa jail guard ang kasamahang preso ng biktima. Kinilala ang bilanggo na nagtangkang magpakamatay sa pamamagitan ng pagsaksak sa sarili na Ceasar Diverson, 44, ng Pag-Asa, Olongapo City. Nakita naman ito ng kasamahan niyang bilanggo na si alias “Tarosa” na humingi agad ng tulong sa jail guard. Agad na rumesponde ang naka-duty noon na jail officer at desk officer  at dinala si Diverson sa James L. Gordon Memorial Hospital upang malapatan ng lunas. Ayon sa pulisya, si Diverson ay nakulong dahil sa kasong paglabag sa RA 9262 o Anti-Violence Against Women and their Children Act of 2004. Inireklamo ito ng kanyang live-in partner na nagsabi sa pulisya na makailang beses nang nagtangkang magsuicide ang kanyang kinakasama. Nangyayari umano ito tuwing sila ay nag-aaway. Nakita mula sa selda ng biktima ang isang plastic na kutsara na ginawang improvised na kutsilyo at blade ng electric fan na pinaniniwalaan ng pulisya na siyang ginamit nito sa tangkang pagpapatiwakal.